Meta ka konfirmuar se do të jetë i pranishëm në mbledhjen e Komisionit Hetimor të ngritur nga mazhoranca, ku kërkohet shkarkimi i tij. Në një njoftim të shkurtër për mediat, ai thotë se si kryetar shteti, i takon të jetë shembull i bashkëpunimit institucional.
Në këtë formë, presidenti Ilir Meta ka hequr çdo dyshim. Ai ka vendosur që të paraqitet në Komisionin Hetimor të ngritur nga Parlamenti, ku po trajtohen shkeljet e pretenduara për rrëzimin e 30 qershorit, si datë për zgjedhjet lokale.
Meta thotë se është “çmendur” këto ditë nga mesazhet e gazetarëve që duan të dinë nëse do të paraqitet përpara Komisionit. Duke e konsideruar këtë pyetje si absurde, Meta thekson se mezi po pret që të kthehet në Parlament.
“Të dashur miqtë e mi gazetarë,
Më “çmendët” me sms tuaja, si asnjëherë tjetër!
Po ç’është kjo pyetje kaq absurde që më bëni të gjithë: A do shkoj tek Parlamenti?!
Së pari, Presidentit si Kryetar i Shtetit, i takon të jetë shembull i bashkëpunimit institucional. Dhe besoj se në këto dy vite kam bërë gjithçka për vendosur këtë bashkëpunim, në respekt të plotë të Kushtetutës, shtetit ligjor dhe interesit publik.
Së dyti, unë mezi pres të kthehem tek Parlamenti”.
