Ministri i Brendshëm, Sandër Lleshaj ka komentuar vendimin e presidentit Meta, për ta rikthyer për rishqyrtim në Kuvend ligjin për vettingun në Policinë e Shtetit.
I ftuar në emisionin “Repolitix”, Lleshaj ka deklaruar se argumentet e Metës janë të gjetura dhe jo ligjore, ndërsa thekson se ata kundërshtojnë çdo iniciativë që ndërmerr qeveria.
Sa i përket, heqjes së kufizimi kohor për kryerjen e vettingut, Lleshaj tha se shkak është bërë numri i lartë i punonjësve që do të duhet të kalojnë këtë proces.
“Argumente presidencial shumë interesantë, por jo ligjorë. Presidenti ka kompetencë ta kthejë ligjin, ndërsa argumentet janë presidenciale. Shqetësimi kryesor është qeveria, ndërkohë që qeveria është autoriteti përgjegjës për ta realizuar vettingun. Një frymë që mbërrin në kufijtë e të paarsyeshmes, ku gjithçka që vjen nga qeveria është problem.
Nuk është hequr struktura e jashtme e vettingut, ajo merret nga fillimi në fund të procesit. Komisioni i jashtëm bën vettingun e majës së policisë së shtetit, gardës dhe SHCBA-së. Ky komision zgjerohet duke krijuar komisionin qendror që bën vettingun e nivelit të mesëm. Pjesa e jashtme plus pjesën që u shtua i shtohet edhe një kontigjent nga ata që vetohen dhe bën vettingun e gjithë strukturës.
Ne kemi dyshime që mund të kemi probleme në policinë e shtetit, por jo kriminelë. Ftoj këdo ta mendojë qoftë edhe një moment pa policinë Shqipërinë”, shtoi ministri.
Ministri tha se nuk e priste këtë vendim të Presidentit Meta, ndërsa beson se Parlamenti do të kalojë të njëjtin ligj pa reflektuar argumentet e Presidentit, pasi sipas tij, ligji ka qenë i plotë.
“Ligji aktual e mbyll vlefshmërinië e tij në mars 2020, ende nuk ka filluar procesi i dosjes së parë, por do të marrë kohën e vet se janë procese ligjore super të ndërlikuara. Nëse e hapim sot dhe aecim me ritmin e reformës në drejtësi, më tej ligji pushon vlefshmërinë dhe procesi stopohet. I kam propozuar kuvendit në mënyrë që ligjin ta zbatojmë, të heqë afatin kohor. Asnjë argument tjetër nuk ka lidhje, sepse janë të njëjtët njerëz.
Sigurisht që ky ndryshim ligjor është vullnet politik i një shumice politike, që ka gjetur miratimin e Parlamentit të Shqipërisë. besoj se ligji nuk do ta humbë miratimin e Kuvendit. Unë i kam hedhur një sy rezervave të argumenteve të presidentit, dhe nuk shoh ndonjë argument për të bërë ndryshim ligjor”, deklaroi Lleshaj.
