Presidenti Ilir Meta ngriti një dolli për funksionimin e Gjykatës Kushtetuese. Në fillim të konferencës për median, para gazetarëve Meta ngriti gotën me ujë dhe tha: “Gëzuar për funksionimin e Gjykatës Kushtetuese!”.
Teksa komentoi mbi deklaratat e shefit të qeverisë sot në Kuvend, pati një porosi të qartë për të. “Të mos fshihet më pas ndërkombëtarëve për Gjykatën Kushtetuese”, shtoi Meta.
Duke folur për kapjen e drejtësisë, ai dha paralajmërimin e fortë. Sipas tij, qytetarëve u mbetet ose të kapin armët, ose të kthehen në skllevër, ose të ikin nga Shqipëria.
“Tani kanë mbetur vetëm tre zgjidhje. Ose njerëzit të marrin armët, ose të bëhen skllevër, ose të ikin të gjithë jashtë vendit… këto janë të papranueshme për mua, dy të fundit tmerrësisht të papranueshme…”, tha Meta.
Më herët, kreu i Shtetit u shpreh se Rama duhet të ndalojë së përdoruri ekspertët e huaj.
“Mos i keqpërdor me SHBA, diplomat e kështu ekspertë, si ata që firmosën për PPP në mënyrë antikushtetuese. Le të përdori sa të dojë, por Kushtetutën e Shqipërisë e kemi bërë me SHBA, BE dhe Komisionin e Venecias. Sepse përndryshe do të ketë hetim ndërkombëtar për këtë çështje, dhe ndëshkim ndërkombëtar për këtë çështje. Sepse ka dy vite që është sabotuar qëllimisht KED, që ky person që u vu në krye të KED, të bëjë këto veprime”, tha ai.
