Kreu i Shtetit, Ilir Meta, ka qenë i ftuar në veprimtarinë “Tirana – Një shekull kryeqytet”, të organizuar në ambientet e Teatrit Kombëtar, nga shoqata “Tirana Intellectum”, në bashkëpunim me shoqatën “Bashkësia Dibrane”. Në fjalën e tij, presidenti Meta është shprehur se Tirana është shndërruar në lokomotivën e zhvillimit në një sërë fushash. Po kështu ai shtoi se Tirana përbën potencialin më të mirë të mendimit intelektual, dhe na udhëheq drejt aspiratës euro-atlantike.
“Tirana ia ka dalë me sukses që të jetë epiqendra e politikës së vendit. Qyteti dikur i vogël, është shndërruar në qytetin më të madh në vend dhe në qendrën kulturore, politike, ekonomike në vend.
Në këtë 100 vjetor, përkulemi para vlerave kulturore të Tiranës. Vlerësoj që po mblidhemi në një pasuri arkitektonike dhe kulturore siç është Teatri Kombëtar. Tirana u bë qyteti i barrikadave në luftën për çlirim, si dhe lokomotiva e zhvillimit në një sërë fushash. Tirana përbën potencialin më të mirë të mendimit intelektual dhe na udhëheq drejt aspiratës euro-atlantike. Shoqata “Tirana Intellectum” po bën një punë shumë të mirë në promovimin e kulturës. Ky 100 vjetor është sipari i këtyre festimeve, do të kemi një sërë festimesh gjatë gjithë vitit”, tha më tej ai.
Në ceremoninë për 100-vjetorin e shpalljes së Tiranës kryeqytet, nuk kanë munguar as batutat nga kryeministri Edi Rama. Ky i fundit tha në Pallatin e Brigadave se Tirana është një qytet ku të huajt gjithmonë kërkojnë të kthehen.
“Sigurisht që përveç Tiranës, e gjithë Shqipëria është tërheqëse, dhe bën që të huajt të rikthehen. E duan shtetasit e Bashkimit Evropian që janë të lodhur ndoshta në vendet e tyre nga rregullat. Apo ata nga SHBA që kur vijnë këtu, ndihen si Papa kur shkon në Argjentinë…”, tha Rama në ceremoni.
Rama u ndal edhe tek historiku i kryeqytetit. “Është një qytet që 100 vjet përpara ishte shumë i vogël, edhe pse kishte Rrugën e Kavajës, Dibrës, Elbasanit dhe Rrugën e Durrësit. Dhe u ndërtua si pak qytete nga shumë duar, që ia lanë stafetën njëra tjetrës”, deklaroi ai.
Rama rrëfeu edhe historinë e një ambasadori, i cili kishte dëgjuar histori të frikshme për vendin tonë. Madje për të mbrojtur veten, kishte kërkuar makina të blindura dhe automatikë.
“Teksa erdhi në Rinas, nuk dilte nga aeroporti sepse donte makina të blinduara dhe automatikë. Kishte frikë se e rrëmbenin, apo mos e martonin me zor. Nuk e di… Kur erdhi tek unë fjala, i thashë po të duash kthehu, sepse këto shërbime nuk i ofrojmë. Të nesërmen kur më takoi më kërkoi falje. Tha se ka parë shumë vende, por kurrë s’e kishte parë veten e tij aq budalla. Pra atë që priste, ta gjente krejt ndryshe”, u shpreh Rama.
