Sali Berisha, Lulzim Basha dhe Ilir Meta, po shkojnë shumë larg në sfidën e tyre ndaj ndërkombëtarëve. Më 2016-ën me reformën në drejtësi, dhe në prag të zgjedhjeve të 2017-ës, SHBA dhe BE arritën në fund t’u imponohen. Sot ata i përcjellin të huajt që takojnë me premtimet për paqe, dhe nga ana tjetër nxehin më tej konfliktin politik.
Prej disa ditësh presidenti Meta, po e sulmon Perëndimin njëlloj si kryeministri hungarez Viktor Orban, që mbron demokracinë e tij “joliberale”. Të dy po flasin në emër të popullit, sulmojnë Sorosin dhe kancelaritë perëndimore. Basha është në një pozitë më delikate, për shkak se financimit ende të pasqaruar, që PD ka marrë nga rusët.
Tashmë të gjithë e pranojnë: Zgjedhjet janë në fakt votime, që nuk i bëjnë nder asnjë vendi demokratik. Këtë e dinë mjaft mirë edhe të huajt. Madje po të ketë një pakt mes palëve, ato mund të ripërsëriten në një ditë me zgjedhjet e parakohshme parlamentare. Por në kushtet aktuale, ato po shndërrohen në një referendum popullor, kundër skenarit të dhunës dhe përplasjes civile.
Të dielën, mund të ketë probleme në shumë zona. Kjo vetëm sa do njolloste më tej, një proces edhe kështu të paragjykuar. Më 1 korrik, Edi Rama mund korrë një “fitore si të Pirros”. Por Berisha, Basha, Meta, do të kenë punë me ndërkombëtarët. Nëse ata kanë qenë seriozë në qëndrimet e tyre, PD dhe LSI mund të pësojnë një delegjitimim të rëndë. Dhe në këto kushte, ato do të pranoheshin me shumë rezerva dhe kushtëzime në një tryezë negociatash pas 30 qershorit, që do të synonte t’i jepte fund krizës.
