Sikur të mos mjaftonte Berisha dhe Rama, tashmë kryetarit të PD-së i është shtuar edhe një tjetër armik. Kryedemokrati Basha tashmë duhet të përballojë edhe Metën. Kreu i shtetit, ilir Meta, në një intervistë për mediat ka deklaruar këtë mbrëmje se është një politikan koherent, që çështjen e moralit e ka shumë të rëndësishme edhe në politikë.
“Jam një politikan koherent që çështjen e moralit e ka shumë të rëndësishme edhe në politikë”, tha Meta. Ai u fokusua tek veprimet e opozitës dhe kryetari i PD-së, Lulzim Basha, për të cilin tha se i është lutur me lot në sy që të shtynte zgjedhjet lokale.
“Kryetari aktual i papjekur i PD-së mu lut me lot në sy të shtyja zgjedhjet lokale. Për të shmangur një gjakderdhje të mundshme, dhe për të ndihmuar opozitën të dilte nga ky qorrsokak ku e kishte futur për të disatën herë, kryetari i papjekur i PD-së, u detyrova të shtyja zgjedhjet”, tha Meta.
Meta nënvizoi ndër të tjera se djegia e mandateve nga opozita dhe zerimi i saj në pushtetin vendor, janë ndër aktet më skandaloze dhe më të rënda që tronditën themelet e shtetit ligjor dhe demokracinë.
“Kjo është një faturë shumë e rëndë e opozitës aktuale në Shqipëri. Këto akte e ndihmuan dhe e përshpejtuan kapjen totale të shtetit. Megjithatë opozita së shpejti shpresoj të marrë në dorë rolin që i takon”, tha Meta.
