Ministrja e Mbrojtjes, Olta Xhaçka, njofton se gjatë natës kanë përfunduar radhët e gjata të pritjes së qytetarëve për të kaluar në pikën kufitare të Kakavijës drejt Greqisë. Ditën e dielë kaluan nga Kakavija 3325 shtetas dhe 1629 mjete.
Ndërkohë, duke filluar nga sot do të hyjnë në fuqi rregullat e reja për të kaluar në Greqi. Përveç testit të koronavirusit, që duhet të jetë kryer 72 orët e fundit, në kufi do të kërkohet aplikimi për të kaluar, do të ketë një numër të limituar personash dhe të gjithë ata që do të kalojnë do të duhet të karantinohen.
Në pikën kufitare të Kakavijës do të kalojnë jo më shumë se 750 persona, ndërsa në Kapshticë jo më shumë se 300 persona. Mëngjesin e sotëm, situata në Kakavijë i është kthyer normalitetit. Tashmë nuk ka më varg kilometrik makinash të familjeve shqiptare, në pritje për të kaluar kufirin.
Statusi
Live nga Kakavija, ku përfundoi procedura e kalimit për qytetarët e fundit. Mirënjohje të thellë për të gjitha strukturat e angazhuara në këto ditë të vështira. Mirënjohje për efektivët e Forcave të Armatosura, Policisë së Shtetit, mjekëve e infermierëve dhe drejtues e punonjës të pushtetit vendor, të cilët me këmbëngulje, durim e punë në grup ia dolën!
