Kreu i Shtetit, Ilir Meta, është ndalur sërish tek ndryshimet kushtetuese, ndërsa ka publikuar një video të kryeministrit Edi Rama, e cila daton në vitin 2013.
Në video shfaqet kryeministri, i cili thotë se Kushtetuta duhet ndryshuar vetëm me referendum.
“Çdo ndërhyrje në Kushtetutë, pavarësisht se nuk përbën asnjë lloj sakrilegji në vetvete, imponon domosdoshmërisht që në funksion të stabilitetit dhe të forcimit të rendit kushtetues, gjithëpërfshirja të jetë koncepti bazë dhe më fillestar i saj.
S’mundet kurrsesi që një proces i tillë të jetë një proces partiak dhe, aq më pak, një proces politikisht i njëanshëm.
Padyshim, edhe në qoftë një proces politikisht i gjithanshëm, kjo është e pamjaftueshme kur flasim për Kushtetutën e një vendi, në jetën e të cilit partitë politike përfaqësojnë shumëçka, por kurrsesi nuk përfaqësojnë gjithçka”, është shprehur Rama.
Në kundërpërgjigje të kësaj deklarate të kreut të qeverisë, presidenti Meta thotë se ky vizion meriton vetëm duartrokitje.
“Ky vizion të dashur miq meriton vetëm duartrokitje! ??? Miratimi i Kushtetutës me REFERENDUM popullor është merita më e madhe e vetë Partisë Socialiste në këto tre dekada!”, shkruan më tej Meta.
