Gazetari Mentor Kikia, duke parë situatën aktuale lidhur me tërmetet, ka dhënë një mesazh ndaj të gjithë qytetarëve që të mbledhin forcat, pasi jeta vazhdon. Në komentin e radhës në Facebook, ai ka qenë mjaft i drejtpërdrejtë me të gjithë qytetarët, duke i kërkuar që të kthehen nëpër banesa, pasi tërmeti nuk parashikohet dot.
Ai shkruan më tej se nëse shkenca do të kishte shpikur mekanizma që do të parashikonte tërmetin, sot bota mund të ishte më ndryshe. E ndërsa “profecia” e Ilir Metës rezultoi një koincidencë e bukur.
Statusi
Kthehuni në shtëpi njerëz, tërmeti nuk parashikohet dot
Askush nuk e ka parashikuar deri tani tërmetin. “Profecia” e Ilir Metës rezultoi një koincidencë e bukur, ndërsa paniku që mban ende njerëz larg shtëpive të tyre, është i pabazë.
Frika është njerëzore. Por 24 orë pas lëkundjes, të pretendosh që qytetarët duhet të flenë nëpër stadiume dhe çadra ushtrie, sepse tërmeti mund të godasë sërish, është i pajustifikuar.
Tërmeti mund të bjerë pas një jave, pas një viti ose pas një shekulli. Nëse shkenca do të kishte shpikur mekanizma që do ta parashikonin tërmetin, sot bota mund të ishte më ndryshe.
Por kjo nuk ka ndodhur, nuk ndodh, e me gjasë nuk do të ndodhë. Ndaj jepini fund panikut, dhe kthejuni normalitetit. Forcat madhore të natyrës nuk janë e nuk do të jenë kurrë në dorën tonë.
