Mediat në Ekuador i kanë kushtuar një artikull të gjatë Dritan Rexhepit, 40-vjeçarit vlonjat, i njohur si një nga bosët e trafikut të kokainës në Amerikën Latine.
Ai u bë i njohur në vendin tonë kur u zbulua lidhja që kishte me rrëmbimin e Jan Prengës në Kamzë në janar të 2020, pasi vëllai i tij Astrit Prenga rrëmbeu një sasi të konsiderueshme kokaine në Angli që vinte nga Amerika Latine, dhe që i përkiste pikërisht Dritan Rexhepit.
Rexhepaj u arrestua në 27 qershor të vitit 2014 në Guayaquil të Ekuadorit, ndërkohë që më pas u zbulua edhe që ai kishte 3 identitete, pasi rezulton i regjistruar me emrat Ioannis Dionysopoulos (emri grek) dhe me Lulëzim Murataj (emri shqiptar).
Ai u dënua në 10 prill 2015 me 13 vite burg dhe u dërgua të vuante dënimin në burgun e Guayaquil, ndërsa nga viti 2017 u transferua në burgun Latacunga.
Në vitin 2020 Rexhepi kishte nisur procedurat për të marrë lirinë me kusht në Ekuador, pasi kishte shlyer 6 vjet, 2 muaj dhe 12 ditë, pra ishte kryer 48.3% të dënimit, ndaj kërkoi lirimin me kusht për sjellje të mirë.
Gjatë seancës dëgjimore ai u shpreh se gjatë pandemisë ai bënte maska dhe pastronte pavionet çdo të dielë, ndërsa shtoi se pothuajse të gjithë në burgun ku ai vuante dënimin ishin të infektuar nga koronavirusi, shkruajnë mediat ekuadoriane.
Por në kohën që ai kërkoi lirimin me kusht dolën në pah infoermacione të reja për 40 vjeçarin. Sipas Europol, ai përdorte mjete të sofistikuara për të drejtuar një organizatë të trafikut të drogës, dhe duke negociuar me kartelet e drogës në Amerikën e Jugut, ai organizoi disa dërgesa të mëdha nkokaine në portet kryesore të Europës.
Kjo bëri që kërkesa e tij për lirim me kusht të refuzohej në 23 dhjetor, ndërsa në “CV-në” e tij ka edhe 3 arratisje nga burgjet. në vitin 2006, nga Policia e Durrësit, në Shqipëri; në 2011, nga burgu i Voghera, Itali; dhe nga Burgu Merksplas, Belgjikë, gjithashtu në 2011.