Media gjermane B24 i ka kushtuar një reportazh të plotë fenomenit të kanabisit dhe kultivimit të tij nga trafikantët e drogës dhe “luftës” që ka nisur qeveria shqiptare ndaj mbjelljes së tij. Por, pikërisht këtu qëndron problemi sipas medias gjermane; tek serioziteti i qeverisë shqiptare për të luftuar këtë fenomen. Sipas Televizionit B24, ata që nisën luftën serioze, si rasti i ish-shefit të anti-drogës Dritan Zaganit, të cilit iu desh të kërkonte azil në shtetin zviceran kur denoncoi trafikantët e drogës të lidhur me qeverinë dhe konkretisht ish-ministrin e Brendshëm Saimir Tahiri. Ky i fundit vijon të jetë nën hetim nga Prokuroria e Krimeve të Rënda si i dyshuar në përfshirjen e trafikut të drogës Shqipëri-Itali.
“E gjitha i ngjan një ofensivë e madhe. Por jo të gjithë besojnë në seriozitetin e saj. Ata që qenë shumë të zellshëm në luftën kundër mafies së drogës, u përplasën me drejtuesit e policisë, dhe në fund madje u detyruan të largohen nga Shqipëria – sikurse është edhe rasti i oficerit të antidrogës Dritan Zagani, i cili ka qenë i papeur në luftën kundër këtij trafiku. Tani ai është azilant në Zvicër. Kjo sugjeron që edhe oficerë të lartë të policisë janë të përfshirë në trafikun e drogës. “Banesa ime u kontrollua, më sekuestruan materialet e punës: kamerat, kompjuterin im dhe të fëmijëve, dhe kërkuan materiale elektronike si USB, pajisje të ndryshme ruajtjeje, gjithçka që kisha, madje edhe telefonat m‘u sekuestruan. Deri më sot, nuk më është kthyer asnjë prej tyre, dhe kur familja ime u kërcënua me jetë, gjithçka përfundoi për mua. Tre fëmijët e mi janë më të rëndësishëm se jeta, puna ime dhe gjithçka tjetër në botë”- thotë Zagani.”, shkruan B24 në reportazhin e saj.
Duke iu referuar seriozitetit të qeverisë shqiptare, media gjermane saktëson se tregu i kanabisit mbetet i pakontrollueshëm nga ana e autoriteteve. Në këtë situatë, qeveria duke dashur të justifikojë luftën e saj, arreston fermerët që gjenden në fushat e kanabisit dhe lë në liri “kokat” e bandave të drogës.
“Megjithatë, plani më i fundit i veprimit të qeverisë, duket se ka pasur sukseset e para. Fotot e fundit nga ajri, tregojnë një sipërfaqe më të vogël të kultivuar me kanabis. Por kjo më tepër, për shkak të stoqeve të mëdha të drogës që ka ende në duar mafia. Pra, policia vazhdon të arrestojë fermerët e vegjël, hallkën më të dobët në zinxhirin e trafikut. Shumat më të mëdha të parave, fitohen nga mbështetësit dhe organizatorët. Dhe ata nuk janë kapur ende. Në fakt, tregu shqiptar i kanabisit është i pakontrollueshëm”, thekson në shkrimin e saj B24. TIRANA TODAY
