Meta ka zbuluar sot se ka pasur një telefonatë me kreun e PD-së, Lulzim Basha, ku ka biseduar në lidhje me situatën politike dhe ngërçin politik për Reformën Zgjedhore. Po kështu tregoi në një prononcim për gazetarët, se ka qenë vetë kryedemokrati Basha që e ka telefonuar dhe është diskutuar për situatën politike.
“Kam pasur një telefonatë zyrtare me Lulzim Bashën këtë paradite e kërkuar prej tij. Nuk mund të them asnjë gjë tjetër. Kjo ka qenë zyrtare, mesazhi im është; jepuni shqiptarëve atë të drejtë që u takon, që të kenë besim te zgjedhjet, te demokracia. Mos i intimidoni më as me arrogancë, as me hezitime, të gjithë të kene besim te demokracia, që fillon te vota dhe zgjedhjet e lira.
Në 2005 kam marrë pjesë, kam luftuar nga dy partitë, edhe pse kam qenë kryetar i një partie që e kam krijuar me emrin tim, nuk e kam vendosur emrin tim në listën e propocionalit, por vetëm mazhoritar. Duhet të kemi besim te demokracia, dhe askush nuk duhet të ketë frikë nga humbja”, tha Meta.
