Meta u shpreh qartë dhe adresoi një thirrje për Ramën, Bashën dhe Kryemadhin, të cilët i quajti “artistë”, për të mundësuar hapjen e negociatave të anëtarësimit të vendit në BE, në muajin tetor. Nga ambientet e Teatrit në Durrës, Meta apeloi palët të ulen për dialog, dhe të bëhen gati për zgjedhjet e 13 tetorit. Ai tha për mediat se është shumë i shqetësuar për atë që ai e cilëson si një teatër politik, që kërcënon vendin të çelë negociatat në tetor.
“Besoj jam shprehur qartë dhe në mënyrë të vazhdueshme, edhe për padinë ndaj ligjit për Teatrin Kombëtar në Gjykatën Kushtetuese. Por ajo çfarë na shqetëson më shumë është ky teatri politik absurd, i cili kërcënon që Shqipëria të ketë mundësi të çel negociatat në tetor. Prandaj ju bëj thirrje të veçantë 3 artistëve që të marrin të gjitha masat, sepse qytetarët kanë nevojë të kenë qetësi, normalitet dhe qeverisje vendore të ligjshme, që jep llogaridhënie për të gjitha shqetësimet e tyre.
Zgjedhjet vendore të 13 tetorit nuk është se zgjidhin gjithçka, por është një mënyrë ligjore dhe kushtetuese dhe është përgjegjësi e kryeministrit për t’i pranuar dhe punuar për zhvillimin e tyre”, përmbylli fjalën e tij presidenti.
Meta: Zgjedhjet do mbahen në 13 tetor, Rama të heqë dorë nga presionet dhe shantazhet
