Vetëm pak minuta më parë, kryeministri Edi Rama ka ironizuar takimet e zhvilluara sot në Presidencë mes Metës dhe aktorëve të rëndësishëm politikë. Vetë kryeministri e refuzoi dje ftesën e Metës për t’u takuar, teksa u justifikua se është i zënë me fushatën.
“Qeshni me ta dhe me qetësi e dashuri t’u japim një mesazh kumbues të dielën,duke votuar ose mosvotuar,por duke qenë të gjithë bashkë në një mendje se Shqipëria s’mund të jetë kurrë, një shesh për përsheshin e gatuar tërë këta muaj, të cilin duhet ta hanë ata që na e servirën”, shkroi kryeministri pak më parë në Twitter.
Ndërsa selinë e opozitës e cilësoi Presidencën e Republikës, teksa ironizoi sërish Metën: “Zyrtare sot: Selia e opozitës rrugore është Presidenca e Republikës dhe udhëheqësi i katër galaktikëve të shtabit të revolucionit imagjinar për të mbrojtur me dhunë republikën e votën e popullit nga vetë populli, është vetë ai, Salvator Haxhi Qametaj?Çfarë karnevalesh politike”.
Por, menjëherë ka ardhur lëvizja e radhës nga ana e presidentit Meta. Mësohet se ky i fundit do të mbajë në orën 14:30 një konferencë për shtyp. Kujtojmë se Meta zhvilloi sot takime me Bashën, Petrit Vasilin, Paskal Milon, aleatët e PD-së, Sorecën, ambasadorët e BE-së si dhe me përfaqësuesen e KiE, Jutta Gutzkow.
Kujtojmë se presidenti Meta priti sot në zyrë kryeministrin Rama nga ora 05:00 deri në 13:00, por ky i fundit refuzoi ta takojë.
