Tërmeti prej 6.4 ballësh i rënë mëngjesin e të martës tronditi Shqipërinë. Në Thumanë dhe në Durrës paraqitet situata më e rënduar, ku ende vijon kërkimi për personat të cilët ende ndodhen në rrënoja. Deri më të tani janë raportuar 29 viktima. Por më shumë se numra, ato janë histori të cilat tronditin këdo që i lexon. E tillë është edhe historia e familjes Çupi në Thumanë.
Fejesa e një prej djemve bëri që e gjithë familja, nëna, babai dhe vëllai i madh të mblidheshin këtë javë. Familjarët ndodheshin në një nga tre pallatet e shembura dhe nuk arritën të shpëtonin. Veç Nikolin Çupit, të riut që priste të fejohej, i cili është një nga të shpëtuarit.
Nikolini veç një javë më parë ishte kthyer nga Greqia. Nëna e tij Lute Çupi dhe babai Hajredin Çupi kanë humbur jetën po ashtu. Ndërsa trupi i pajetë i Lutes është nxjerrë nga rrënojat, ende vazhdojnë kërkimet për Hajredin Çupin.
Ndërsa, Keli, djali tjetër, po para disa ditësh ishte kthyer nga Anglia për të qenë i pranishëm në gëzimin familjar. Pasi qëndroi nën rrënoja për 17 orë me radhë, ai jepte shenja jete. Madje ka arritur të flasë në telefon me forcat operacionale, ku ka kërkuar edhe ujë. Po r, tragjikisht, ai humbi jetën pasi doli për shkak të një hemorragjie cerebrale.
Ankthin më të madh e kanë përjetuar edhe të afërmit të cilët për orë të tëra qëndruan jashtë perimetrit të sigurisë. Me shpresën se të dashurit e tyre do të ishin gjallë. Edhe pse kalonin orë të tëra. Siç duket dhe në pamjet e transmetuara nga Tirana Today, ku vjehrra e Kelit kërkon dëshpërimisht t’i shpëtojnë.
“Të lutem, kthemi me jetë. Më lini të kaloj se i tërheq vetë. Sa erdhi djali, shkoni nxirreni. Aman more ti djalë, aman mi shpëtoni.”
Të mpirë dhe me dhimbje të jashtëzakonshme shumë nga familjarët tentonin të afroheshin. Por, si pasojë e lëkundjeve të vazhdueshme të tërmetit; forcat operacionale nuk i lejonin të kalonin zonën e rrezikut.
Dita e sotme është shpallur nga qeveria ditë zie ndërkombëtare, ndërsa të gjithë qytetarët brenda dhe jashtë vendit janë solidarizuar me banorët e prekur./ TIRANA TODAY
