Ish-kryeministri Sali Berisha ka pohuar se po punon për bashkimin e PD-së. “Po merrem me intensitetin më të madh për bashkimin e Partisë Demokratike”, u shpreh Berisha për gazetarët, jashtë ambienteve të Kuvendit. Berisha u pyet vazhdimisht nga gazetarët për situatën në të cilën ndodhet Partia Demokratike, dhe për dorëheqjen e Lulzim Bashës nga posti i kryetarit. Ai nuk pranoi të komentonte më gjatë për këtë çështje, duke thënë se sot kryefjala e ditës është rritja e çmimeve nga lufta Rusi-Ukrainë, dhe roli i gazësjellësit TAP që Europa të mos ketë varësi nga gazi rus.
“Unë po flas për një projekt të shekullit, mos e ngatërroni me Lul Bravën. Unë vetëm kaq mund t’ju them ju. Po merrem me intesitetin më të madh për bashkimin e Partisë Demokratike”, tha Berisha.
I pyetur si po shkon procesi gjyqësor për shpalljen “non grata”, Berisha tha: “Nuk kam një komunikim të fundit. Berisha merret me transparencën dhe sot ishte një rast të rikujtoja atë që thashë. Një mesazh për ata që shpallën Sali Berishën “non grata”. I them mafies së George Sorosit se vetëm për TAP-in, Sali Berishës i janë propozuar shumat më përrallore që mund t’i imagjinoj kush. Por ai qëndroi në mbrojtje të interesave të vendit të tij dhe interesave të Bashkimit Evropian, pasi isha i bindur se një dar gazi nga veriu dhe jugu ishte gjëja më e keqe për Shqipërinë dhe Evropën. Më janë ofruar nga Gazprom”, tha me tej Berisha.
