Boksieri shqiptar, Jurgen Uldedaj është shpallur kampion bote në kategorinë “Junior WBC” mbrëmjen e së shtunës. Një sukses i jashtëzakonshëm, duke ruajtur edhe pathyeshmërinë në ring. Në këtë përballje Uldedaj dueloji me polakun Krzisztof Tvardovski në duelin e zhvilluar në Magdenburg të Gjermanisë, ku fitoi me pikë 97-93.
Sfida ishte me 10 raunde gjithsej, ku Uldedaj arriti të jetë superior në 7 raunde duke u kurorëzuar kampion. Një paraqitje fantastike nga Uldedaj që rrëmben një tjetër titull të rëndësishëm në karrierë pas titullit “Junior WBO” të fituar disa muaj më parë në Tiranë, kur mposhtte rivalin argjentinas Nikolas Leandro Arganaraz.
Ky ishte suksesi i 11-të për boksierin nga Lezha në po kaq ndeshje të zhvilluara dhe vazhdon kështu të jetë i pamposhtur në ring. Ndonëse në një moshë të re, Jurgen Uldedaj duket në rrugën e duhur dhe nuk ka ndërmend aspak të ndalet, ku premton të tjera paraqitje të shkëlqyera edhe në të ardhmen.
Megjithëse u kurorzua kampion, kjo sfidë nuk ishte shumë e lehtë për Uldedaj, pasi në fund të ndeshjes ai tha: “Kam thyer dorën time të djathtë”.