Pas dy rasteve të para të konfirmuara me koronavirus në Shqipëri, qeveria njoftoi marrjen e masave më të rrepta.
Në mbledhjen e djeshme të task forcës kryeministri Rama deklaroi se do të anuloheshin fluturimet me pjesën veriore të Italisë dhe se institucionet arsimore do të mbylleshin për 2 javë.
Në lidhje me mbylljen e shkollave foli edhe ministrja Shahini, e cila sqaroi se ato do të qëndronin të mbyllura deri më 23 mars.
Ajo tha se orët mësimore do të zhvendosen online, në mënyrë që nxënësit të mos mbeten mbrapa me mësimet.
Ditën e sotme, Shahini ka publikuar linqet e të dy librave të maturës, matematikës dhe gjuhës shqipe, ku maturantët mund të lexojnë. Kjo sipas ministres, do t’i ndihmojë ata për t’u familjarizuar me natyrën e testeve.
Ajo iu bëri thirrje atyre që gjatë kësaj kohe të punonin me librat e Maturës Shtetërore, që janë përmbledhje e testeve dhe skemave të vlerësimit për gjuhën e huaj, matematikën dhe lëndët me zgjedhje për vitet 2011-2019.
