Pas Ministres së Arsimit, reagimi i radhës ka ardhur nga kryeministri Edi Rama për mbylljen e shkollës private turke në Tiranë, “Mehmet Akif”. Kreu i qeverisë mohon që pas këtij vendimi të fshihet diçka tjetër si arsye, përveç asaj që e quan zbatim i barabartë i ligjit.
“Përdorimi i fëmijëve pastaj për të fshehur fajin karshi ligjit, prindërve dhe vetë nxënësve, duke luajtur rolin e viktimës së qeverisë, kur në fakt je verifikuar jo një po dy herë në shkelje, tregon ndërgjegje të ulët në raport me misionin e lartë të një vatre edukimi.
Të shesësh godinën ku ke lejen e aktivitetit shkollor dhe të hapësh aktivitetin diku tjetër, pa marrë lejen sipas ligjit, pa plotësuar kriteret e pa përmbushur standartet e kërkuara ligjërisht, është një shkelje për të cilën ligji parashikon heqjen e liçencës.
Pas çdo vendimi kërkohet një qëllim tjetër nga i vërteti dhe bombardohet publiku me lajme të rreme e me teori konspiracioni! S’ka asgjë të tillë dhe asnjë qëllim tjetër përveç zbatimit të barabartë të ligjit në rastin e heqjes së një liçence shkolle si plot të tjera më parë”.
Përdorimi i fëmijëve pastaj për të fshehur fajin karshi ligjit, prindërve dhe vetë nxënësve, duke luajtur rolin e viktimës së qeverisë, kur në fakt je verifikuar jo një po dy herë në shkelje, tregon ndërgjegje të ulët në raport me misionin e lartë të një vatre edukimi.
— Edi Rama (@ediramaal) September 23, 2022
Dje Këshilli i Ministrave mori vendimin për të mbyllur kolegjin jo publik turk “Mehmet Akif Ersoy”. Vendimi për mbylljen është marrë 10 ditë nga nisja e shkollës dhe stafit të kolegjit i kërkohet që të pajisë me dokumentacionin e nevojshëm të gjithë nxënësit për transferimin e tyre në shkollat e tjera. Për këtë i ngarkohet detyrë Drejtorisë Arsimore të Tiranës, që të kryejë transferimin e fëmijëve.
Shkollës që po mbyllet i kërkohet që të mbulojë të gjitha shpenzimet për kryerjen e procedurave për transferimin e nxënësve. Por edhe të kthejë pagesat e kryera nga prindërit për vitin e ri shkollor, si dhe çdo detyrim tjetër të papërmbushur që mund të ketë ndaj nxënësve. Ndërsa të gjitha dokumentet duhet të dorëzohen në arkivën e Drejtorisë Arsimore.
