Frika nga koronavirusi të çon drejt veprimeve të papërgjegjshme. Një person në Lituani ka mbyllur bashkëshorten e tij në tualetin e shtëpisë, pasi dyshonte se ishte infektuar nga koronavirusi.
Burri ishte frikësuar tej mase, pasi kishte marrë informacione se bashkëshortja e tij ishte takuar me një kineze që vinte nga Italia. Gruaja ka lajmëruar policinë, dhe vetëm agjentët kanë mundur ta lirojnë.
Para policisë, burri u justifikua me faktin se kishte qenë i detyruar të vendoste bashkëshorten e tij në karantinë, si një masë për të shmangur përhapjen e virusit.
Pavarësisht këtij akti, gruaja nuk e denoncoi burrin e saj në polici, dhe çështja është mbyllur. Ajo ka kryer testin për koronavirus, dhe rezultoi negative.
Në botë është parë një rritje e shpejtë dhe përhapje e menjëhershme e koronavirusit, duke çuar kështu në izolimin e shumë shteteve.
Jashtë territorit të Kinës, vendi i goditur më fort deri më tani është Koreja e Jugut dhe Irani.
