Dje Greqia raportoi një rritje rekord të rasteve të reja me koronavirus. Autoritetet shëndetësore në vendin fqinj thanë se gjatë 24 orëve të fundit, u konfirmuan 1.690 të infektuar. Spitalet janë të mbingarkuar, teksa në kujdesin intensiv po trajtohen 128 persona.
Kryeministri Kyriakos Mitsotakis shpalli sot planin 30 ditor, për të parandaluar një valë të dytë të pandemisë. Plani do të nisë që nga 3 nëntori, dhe do të zgjasë deri më 3 dhjetor. Epidemiologët kanë parashikuar që ta ndajnë vendin në dy zona, atë të survejancës dhe riskut të shtuar për shkak të koronavirusit.
Në zonën me risk të shtuar do të mbyllen restorantet, ambientet për argëtim, kulturë dhe sporte, bare, kafe, kinema, muze, palestra. Do të ndalohet udhëtimi jashtë zonës. Megjithatë lëvizja përbrenda do të jetë e lirë, ndërsa dyqanet dhe shkollat do të qëndrojnë të hapura.
Mitsotakis e konsideroi muajin që po lemë pas si “tetori i kuq”, për shkak të rritjes të madhe të numrit të rasteve me Covid.
“Mesazhi im sot është diçka të cilën nuk do të doja ta bëja. Por jam i detyruar të mos i mbaj sytë mbyllur përballë realitetit të vështirë. Më duhet të vendos shëndetin dhe sigurinë e çdo greku përballë çdo alternative tjetër. E kam këtë borxh, dhe për këtë punë jam këtu”, tha ai.
