Deputeti Ralf Gjoni ka kërkuar që të tërhiqet amendamenti i propozuar nga znj. Bode. Teksa mori fjalën e tij në seancën plenare në Kuvend, Gjoni tha se po bëhet keqpërdorim i amendamentit, për ta futur dhe për ta ndryshuar Kodin Penal. Por duket se kjo gjë e ka revoltuar tej mase kreun e Kuvendit, Gramoz Ruçi, i cili ia ka prerë shkurt. Pasi ka dëgjuar akuzat e parashtruara nga deputeti Gjoni, kryeparlamentari i ka kërkuar që të mos spekulojë.
Pjesë nga debati:
Ralf Gjoni: Futja vjedhurazi në një mënyrë tinëzare duke keqpërdorur një nga deputetet më të mira mjeke, zonja Bode, nga më korrektet dhe një nga njerëzit më me integritet. Keqpërdorimi i një zonje të nderuar, zoti kryetar, keqpërdorimi që po i bëhet një zonje kolege, grua në këtë Kuvend, për të ndryshuar Kodin Penal dhe për t’i trajtuar shqiptarët si kriminelë…
Gramoz Ruçi: Po e thua për procedura dhe nuk po e thua….mbylle tani hajt…
Ralf Gjoni: Amendimi i zonjës Bode është keqpërdorim. I bëj kërkesë mazhorancës të kërkojë minimunim e korrektësisë, dhe të tërheqë amendamentin e zonjës Bode. Rendi i ditës nuk mund ta trajtojë sot këtë. Ndryshe është e pamunduar t’i mbështesim këta.
Gramoz Ruçi: Zoti deputet mos spekulo të lutem. Mos spekulo me kërkesën për të folur për procedurë. A ka mundësi të më dëgjoni? Kërkuat të flisni për procedurë, por folët në kundërshtim me të. Kam respekt për arsimimin tuaj dhe për mënyrën se si artikuloheni. Amendimet janë sipas të gjitha rregullave, dhe është diskutuar në mënyrë transparente në Komisionin e Ligjeve, dhe ju keni qenë prezentë. Zonja Hysi do të flasë, sepse është profesoreshë, jo unë e ti…
Deputetja Edlira Bode ka propozuar një amendament për ndryshimin e Kodit Penal, duke parashikuar deri në 15 vjet burg për personat që thyejnë karantinën dhe infektojnë të tjerët. Kjo ka prodhuar debate publike. Opozitarët Rudina Hajdari, Ralf Gjoni, Andi Përmeti dhe Alban Zeneli, si dhe Komiteti Shqiptar i Helsinkit, i kanë kundërshtuar këto ndryshime.
