Pas lajmit se Britania e Madhe do të kryeje 200 mijë testime çdo ditë deri në fund të majit, kryeministri Johnson ka bërë një tjetër njoftim.
Ai ka paralajmëruar lehtësimin e disa prej masave shtrënguese të hënën, më datë 11 maj. Johnson tha se do të dalë në një deklaratë ditën e diel, ku edhe do shpjegojë konkretisht se cilat janë masat që do të lehtësohen.
Sipas “The Guardian”, masat lehtësuese mund të vijnë në lejimin e më shumë aktiviteteve në natyrë, si dhe në hapjen e shumë bizneseve me kushtin që të respektojnë protokollin për distancën fizike.
“Ne duam, nëse kemi mundësi, të hënën të lehtësojmë disa nga këto masa shtrënguese”, tha Johnson.
Mbretëria e Bashkuar numëron deri më tani më shumë se 194 mijë raste infektimi, dhe mbi 29 mijë viktima.
