Me 7 vota pro dhe 2 kundër, Komisioni Hetimor i ngritur për hetimin me qëllim shkarkimin e Presidentit Ilir Meta, miratoi paraditen e sotme kërkesën për zgjatjen me dy muaj të punimeve. Kjo kërkesë tashmë do t’i kalojë Kuvendit, për miratim në seancën e datës 3 tetor.
Kujtojmë se mbledhja e sotme nisi me debate të shumta. Kryetari i Ballit Kombëtar, Adriatik Alimadhi, duke kërkuar fjalën pas kreut të Komisionit, Ulsi Manja, ka theksuar se ky komision nuk duhet të ekzistojë. Sipas tij, komisioni nuk ka elementët e duhur për të ndjekur një procedurë ndaj hetimit të Presidentit, sepse nuk ka asnjë marrëveshje sipas tij, nga ana e Presidentit, që prekin interesat e shqiptarëve.
“Unë gjykoj se ky komision nuk duhet të ekzistojë sepse nuk ka elementët e duhur për të ndjekur një procedurë ndaj hetimit të Presidentit sepse nuk kemi shkelje të rëndë. Pra, jo për ta shtyrë afatin, por nuk kemi një shkelje të rëndë që fajëson Presidentin sepse Presidenti nuk ka bërë ndonjë marrëveshje që prek interesat e këtij vendi, apo prek interesat e shqiptarëve”, tha Alimadhi.
