Aktorja e famshme ndërroi jetë më 18 shtator 1990, në moshën 85-vjeçare. Ajo u bë e njohur në mbarë botën në vitet 1920-1930, dhe fitoi shumë çmime për rolet e saj në filma si “The Torrent” (1926), “Anna Christie” (1930), “Mata Hari” (1931), “Grand Hotel” (1932), ” Anna Karenina” (1935) dhe “Camille” (1936).
Sytë tejet shprehës, aktrimi delikat dhe sensualiteti i Garbos, bëri për vete audiencën dhe kritikën. Natyra e saj e tërhequr jashtë ekranit të madh, vetëm sa e shtoi misteret rreth saj. Greta Garbo, lindi si Suedi më 18 Shtator 1905 si Greta Lovisa Gustavson. Gjatë fëmijërisë, e vuajti varfërinë e familjes së saj.
Babai vdiq kur ajo ishte vetëm 14-vjeçe, ngjarje që e detyroi të nisë punë në një dyqan rrobash. Në vitin 1924, fitoi një bursë për të studiuar për aktrim në Teatrin Mbretëror Dramatik. Në atë kohë luajti në filmin pa zë “Saga e Gosta Berlingut”. Pas këshillave të drejtorit të Teatrit, Moris Stiller, ajo e ndryshoi mbiemrin në Garbo.
Kur shkoi në SHBA në vitin 1925, Garbo nuk dinte asnjë fjalë anglisht. Edhe kur e mësoi gjuhën, theksi i saj i rëndë i bëri drejtuesit e studios së njohur “Metro Gold Mayer” të hezitonin ta kalonin nga filmat pa zë në ato me zë. Gjithsesi në vitin 1930, ajo u shfaq në filmin e saj të parë me zë “Anna Christie”, që rezultoi një sukses i madh.
Garbo u nominua për çmimin e aktores më të mirë në Acadamy Awards. Regjizorët që punonin me të thoshin, se ajo ishte një natyrë tepër e ndojtur. Kur xhironin skena intime, Garbo kërkonte që në sheshin e xhirimit të mbetej vetëm kameramani, ndërsa të tjerët duhej të dilnin jashtë, të pinin ndonjë cigare apo kafe.
Gjatë një interviste të dhënë në vitin 1927, ajo e shpjegoi kështu natyrën e saj të mbyllur: “Kur isha e vogël, dëshiroja të qëndroja gjithnjë vetëm. Unë i urrej turmat… nuk më pëlqen të ndodhem në mesin e shumë njerëzve”. Më vonë, Garbo përdori pseudonime të ndryshme, dhe blinte shumë vende në avion apo teatro për të ruajtur privatësinë e saj.
Në filmat e saj, ajo ka luajtur e rolin e një spiuneje ruse dhe atë të spiunes së famshme, balerinës holandeze Mata Hari. Por Greta Garbo, ka qenë spiune edhe në jetën reale. Burime të ndryshme, pretedojnë se ajo mblodhi informacione të shumta për simpatizantët nazistë në Suedi për llogari të shërbimin sekret britanik.
Garbo u thoshte shpesh miqve të saj se dëshironte të takohej me Adolf Hitlerin, që i kishte dërguar asaj një letër si një fans i zjarrtë, në mënyrë që të mund ta vriste me një armë të fshehur në çantë. Me tre nominime për Academy Awards, Garbo u tërhoq nga aktrimi në vitin 1941 pas rolit të saj në filmin romantik “Gruaja me dy fytyra”, edhe pse në atë kohë ishte vetëm 36-vjeçe.
Edhe pse media e cilësoi si një ndërprerje të përkohshme, Garbo nuk u shfaq më kurrë në ekran. Në një rast kur ishte në moshë të thyer, ajo i tha një miku të saj:”Mos më pyet kurrë për filmat… dhe sidomos pse i braktisa ato”.
Për dekada me radhë, kritikët e filmit dhe biografët e saj kanë spekuluar mbi seksualitetin e Garbos. Edhe pse nuk u martua asnjëherë, Garbo ka pasur me sa duket marrëdhënie me shumë burra dhe gra, përfshirë këtu edhe të dashurin e saj më jetëgjatë, aktorin Xhon Xhillbert, për të cilin thuhet se e braktisi në altarin e kishës.
Një numër grash, kanë pretenduar se kanë pasur marrëdhënie romantike me Garbon, që e përshkruante gjithnjë veten një “beqare”. Pasi u tërhoq nga aktrimi, Garbo koleksionoi shumë piktura dhe mobilje franceze të shekullit XVIII-të, që pas vdekjes së saj u nxorrën në ankand.
Për gati 4 dekada, Garbo shëtiste rregullisht rrugëve të Manhatanit në Nju Jork, duke parë njerëz dhe bërë pazar.
Edhe pse maskohej duke veshur pantallona burrash, syze dielli dhe kapele të mëdha, si dhe shumë pseudonime, shumë banorë të Nju Jorkut entuziazmoheshin kur zbulonin se kush ishte ajo. Në vitin 2015, Banka Kombëtare e Suedisë, hodhi në treg një seri kartëmonedhash me figurat më të rëndësishme në historinë e vendit. Kartëmonedha e re 100 krona, paraqet pikërisht Greta Garbon.
TIRANA TODAY
Denonco ne TT