Deputeti i Partisë Socialiste, Pandeli Majko nuk do të jetë në legjilaturën e ardhshme të Kuvendin, pasi nuk arriti të fitonte mandatin, në zgjedhjet parlamentare të 25 prillit.
I renditur i 19-ti në qarkun e Tiranës, Majko nuk mundi të thyejë herësin, për shkak se Partia Socialiste siguroi 18 mandate.
Përmes një reagimi në rrjetet sociale, Majko u shpreh se nuk do të jetë deputet, edhe pse ishte një nga 10 kandidaturat më të votuara.
Ai deklaroi se fushatën për veten e tij e kaloi në plan të dytë, pasi ishte i bindur se PS do arrinte që të fitonte 19 mandate.
Postimi i Majkos në rrjetin social, Facebook
Miq, megjithëse matematika më rendit në 10 kandidaturat e votuara në qarkun e Tiranës, në zgjedhjet e 25 prillit, unë nuk do të jem deputet në Kuvendin e Shqipërisë.
Sistemi elektoral është ky që kemi pranuar. Përvoja më ka mësuar se duhet të jesh i gatshëm të shohësh atë që ekziston.
Isha i bindur se do ti fitonim 19 mandate në Tiranë. Ndaj fushatën për numrin tim personal 19 e kalova në plan të dytë. Edhe për këtë arsye, rezultati nuk është një përrallë që e mposht me logjikë.
Ju falenderoj që votuat për numrin 12, Partinë Socialiste!
Sic do të thoshte im atë ndjesë pastë,… “19-ta kërkon leje për tu ulur në aeroport!” Ju jam mirënjohës që më bëtë ky që jam.
Shpresoj tu kem dhënë “everything”! Mirupafshim!
Pandi
Tiranë 30 Prill 2021
