Në Gjykatën e Shkodrës është dhënë masa e sigurisë për tetë të ndaluarit, në kuadër të operacionit “North Forex”. Gjykata e Shkodrës pasi ka shqyrtuar provat e prokurorisë, ka vendosur masën e sigurisë “detyrim paraqitje” për të ndaluarit, të cilët kanë qenë punonjës të kompanisë. Pala mbrojtëse ka kërkuar lirimin, pasi të arrestuarit nuk kanë pasur dijeni për skemën e mashtrimit që pretendohet.
Platformat me të cilët ata punonin rezultojnë të jenë Vicidial, Forex dhe Exchange. Të treja platformat ishin funksionale brenda ambienteve të një call centeri që rezulton të jetë në pronësi të polakut Pawel Wziontek. Ky i fundit, bashkëjetësuesja e tij Alma Sokoli dhe një mik i identifikuar si Klodian Memo janë shpallur në kërkim. Hetimet vijojnë për verifikimin e të gjitha investimeve në pasuri të luajtshme dhe të paluajtshme që kanë bërë personat e përfshirë në ketë veprimtari, në koordinim dhe me autoritetet gjermane, spanjolle dhe polake, me qëllim konfiskimin e te gjitha aseteve të përfituara nga kjo veprimtari e paligjshme.
