Masat ndaj koronavirusit/ Arrestohen mbi 100 protestues në Gjermani

Më shumë se 100 gjermanë janë arrestuar nga policia, pasi kanë dalë të protestojnë kundër masave të ndërmarra për frenimin e përhapjes së koronavirusit.

Në Gjermani janë ndaluar me ligj grumbullimet masive, por kjo nuk i ka ndaluar protestuesit të mblidhen në sheshin kryesor të Berlinit.

Mediat evropiane raportojnë se qeveria gjermane ka urdhëruar që të mos lejohet që më shumë se 20 njerëz të mblidhen në një vend, e po ashtu të respektohet distancimi social.

Protestuesit mendojnë se gjendja e jashtëzakonshme ka kaluar dhe se jeta duhet të kthehet në normalitet. Raportohet se 105 persona janë arrestuar nga policia.

Gjermania renditet e pesta në botë për numrin më të madh të infektuarve, por ndryshe nga SHBA, Italia, Spanja dhe Franca, ajo shënon një numër më të vogël të viktimave.

SHBA regjistron 963,472 raste dhe 54,357 viktima,

Italia regjistron 195,351 raste dhe 26,384 viktima,

Spanja regjistron 223,759 raste dhe 22,902 viktima,

Franca regjistron 161,488 raste dhe 22,614 viktima,

Gjermania regjistron 156,727 raste dhe vetëm 5,880 viktima.

Ndërkohë që edhe Mbretëria e Bashkuar që shënon një numër më të vogël të rasteve (149 mijë), regjistron pothuajse 4-fishin e viktimave (20,787).