Autoriteti i Aviacionit Civil (AAC), ka vënë në zbatim urdhërin e qeverisë për pezullimin e fluturimeve nga Shqipëria drejt 10 aeroporteve në veri të Italisë. Këto masa parandaluese janë marrë deri në datën 3 prill, dhe ndalohen fluturimet drejt rajoneve të Italisë, shpallur si ‘zona e kuqe’.
Ministria e Shëndetësisë ka kërkuar ndaj të gjithë shtetasve që vijnë në Shqipëri nga zonat e prekura të Italisë, të vetëizolohen në shtëpitë e tyre. Mosrespektimi i këtij urdhri, shkon përtej përgjegjësisë personale, pasi përbën kundërvajtje administrative dhe dënohet me gjobë.
Sipas ligjit “për parandalimin dhe luftimin e infeksioneve dhe sëmundjeve infektive”, personat që nuk zbatojnë këtë urdhër, ndëshkohen me gjobë që varion nga 10 në 50 mijë lekë të rinj.
