Ish-kryetarja e Kuvendit, Jozefina Topalli, u përfol në media se do të bënte marrëveshje me kryeministrin Rama për t’u bërë presidente pas zgjedhjeve të 25 prillit.
Por, vetë Topalli në një intervistë për “Euro news” i ka mohuar këto fjalë, duke zbuluar edhe bisedën e vetme që ka bërë me kryeministrin.
“Nuk kam asnjë komunikim me Edi Ramën, kam pasur komunikim vetëm njëherë kur kishte një rast të një fatkeqësie shumë të rëndë në qytetin tim dhe një familje më kërkoi që të ndërhyrja për të zgjidhur një problem dhe me sa kam digjeni ai i është përgjigjur familjes që kishte problemin. Më vjen shumë keq që janë aq larg të vërtetës”, tha Topalli.
Ajo tha se nuk përjashtonte mundësinë për të bashkëpunuar me forca të tjera të djathta.
“Asnjëri nuk ka luksin për të refuzuar tjetrin përballë tre njerëzve që mbajnë peng 3 milionë shqiptarët. Nuk është momenti për të parë defekte por është shansi për ti dhënë mundësi vendin qe të mos rrëshqasë më tej”, u shpreh Topalli.
Pak ditë më parë, Topalli prezantoi forcën e saj të re politike, ‘Lëvizja për Ndryshim’.
