Ministri i Punëve të Jashtme i Serbisë, Ivica Daçiç është shprehur se suksesi në dialogun mes Kosovës dhe Serbisë varet nga sesa pala kosovare është e gatshme për kompromis.
“Nëse ata mendojnë se kompromisi dhe zgjidhja është që ne thjesht ta njohim Kosovën, duhet ta dinë që është jo reale dhe askush nuk mund ta kërkojë këtë”, tha ai.
Në një prononcim për TV Pink, Daçiç tha se qëllimi i tyre është që Serbia të ruajë interesat e saj nacionale dhe shtetërore.
“Në këto tetë vjet, ne kemi filluar negociata serioze dhe dialogu duhet të vazhdojë. Sigurisht se ne kemi bërë edhe diçka të gabuar. Së pari, fakti që ne iu drejtuam Gjykatës Ndërkombëtare të Drejtësisë në Strasburg, të cilën ata e përdorin sot si alibi se gjithçka është zgjidhur, dhe tjetra është se Tadiq e ndryshoi vendimin e Qeverisë dhe rezolutën e paraqitur të Jeremiqit e barti në Bruksel”, shtoi ai.
Sipas tij, çfarëdo marrëveshje të arrihet duhet të verifikohet në Këshillin e Sigurimit të Kombeve të Bashkuara.
“Ekziston dëshira për të shpejtuar negociatat, por edhe një mungesë idesh se cili do të ishte ai kompromis. Dashtë Zoti që të zgjidhet kjo dhe ne të kënaq interesat tona nacionale, por nuk jemi shumë optimistë”, përfundoi ai.
