Maqedonia e Veriut, bilanc tragjik nga Covid-19 në 24 orët e fundit

Maqedonia e Veriut  ka regjistruar 33 viktima me koronavirus, 946 persona të infektuar si dhe 789 persona të shëruar në 24 orët e fundit.

Të dhënat i referohen testimit të 2,564 mostrave. Viktimat, sipas raportit të Ministrisë janë, nëntë në Shkup, gjashtë në Prilep, katër në Strugë, dy në Pehçevë dhe nga një në 12 qytete tjera.

Numri i përgjithshëm i personave të diagnostikuar me sëmundjen COVID-19, që shkakton koronavirusi, në Maqedoninë e Veriut ka arritur në 63,890 persona.

Prej tyre 1,825 kanë ndërruar jetë, 40,977 janë shëruar ndërsa 21,088 janë ende raste aktive.

Numri më i madh i të vdekurve dhe të infektuarve është në Shkup me mbi 50 për qind të rasteve, pasuar nga qytetet e Tetovës dhe Kumanovës.

Vetëm gjatë muajit nëntor janë regjistruar 769 të vdekur, shifër kjo përafërsisht e njëjtë me periudhën mars-tetor kur janë regjistruar 994 të vdekur.