Në Maqedoninë e Veriut, është regjistruar rasti i dytë me variantin indian të Covid-19. Lajmi është bërë i ditur nga Ministri i Shëndetësisë, Venko Filipçe, i cili tha se bëhet fjalë për rast të izoluar dhe se gjendja shëndetësore e pacientit është e qëndrueshme.
Personi i infektuar me variantin indian, aktualisht po merr trajtim mjekësor në një klinikë private në Shkup, shkruan Alsat.
Megjithatë, Filipçe është shprehur se ende nuk ka nevojë që të merren masa shtërnguese.
“Kemi edhe një rast të ri më llojin indian të virusit Kovid-19 dhe i njëjti po kurohet në një klinikë pritave. Ekziston frikë gjithkund sa i përket virusit të llojit indian ose ndonjë mutacioni tjetër, gjë për të cilën diskutuam edhe në procesin Berlinit. Pasqyra epidemiologjike në rekomandon se nuk duhet masa shtrënguese të reja,” u shpreh Filipçe.
Ndërkohë, ditën e sotme mijëra qytetarë të Maqedonisë së Veriut, kanë nisur të rivaksinohen në Serbi, ku më parë kishin marrë dozën e parë kundër koronavirusit. Sipas të dhënave jozyrtare të Ministrisë së Shëndetësisë, bëhet fjalë për rreth 15 mijë persona që të shtunën dhe të dielën do të marrin dozën e dytë të vaksinës AstraZeneca.
Ata janë persona nën moshën 60 vjeç, që nuk kanë pasur mundësi të vaksinohen në Maqedoninë e Veriut.
