Ish-Ministri i Drejtësisë, Ylli Manjani, dje në “Opinion” deklaroi se shpërndarja e rrogave të shqiptarëve në këtë moment është bërë me qëllim. Ai zbuloi se këto lista kanë pesë muaj që qarkullojnë, por dalja e tyre tani është bërë me qëllim largimin e vëmendjes nga ngjarjet politike.
“Që të jemi realist që këto janë bërë me qëllim, janë me qëllim. Këto kanë 5 muaj që qarkullojnë në telefonat e njerëzve. Përse kanë dalë tani? Largimin nga vëmendja politike. Largimin e vëmendjes nga një skandal politik tek një tjetër”, tha Manjani.
Një ditë më parë, Prokuroria e Tiranës tha se kishte nisur verifikimet, pasi kishte marrë një referim mbi rrjedhjen e të dhënave të të punësuarve në Shqipëri, së bashku me databazën përkatëse.
Kujtojmë këtu se rrjedhja e të dhënave pason një tjetër rast të njohur si “skandali i patronazhistëve”, ku një databazë me të dhënat personale të qytetarëve shqiptarë përdorej nga Partia Socialiste për qëllime elektorale.
Të dhënat e databazës së rrjedhur në media në muaji prill, tregonin se Partia Socialiste kishte krijuar një ushtri me patronazhistë në Tiranë përpara zgjedhjeve, të cilët përdornin të dhënat personale dhe kontaktet e qytetarëve të Tiranës.
