Kolegji Zgjedhor pritet të shqyrtojë të hënën vendimin e partisë së drejtuar nga Idajet Beqiri për t’u ç’regjistruar nga pjesëmarrja në zgjedhje.
Sa i përket kësaj, ish-Ministri i Drejtësisë, Ylli Manjani është shprehur se Kolegji nuk mund të shqyrtojë ankesa të subjekteve politike jashtë procesit zgjedhor.
Nëpërmjet një statusi në Facebook, Manjani deklaron se pas dekretit të Presidentit nuk jemi më në proces zgjedhor, ndaj debati ka të drejtë një subjekt të qëndrojë apo të largohet nga zgjedhjet, nuk ka kuptim.
“Formalisht pas Dekretit të Presidentit ne nuk jemi në proces zgjedhor. Ndaj debati ka apo jo të drejtë një subjekt të largohet apo të rrijë në zgjedhje nuk ekziston përsa kohë që s’ka zgjedhje”, shkruhet në postimin e Manjanit.
Sipas tij, Kolegji gabon duke pranuar gjykimin e kërkesës së zotit Idajet Beqiri kundër KQZ sepse “së pari ajo mosmarrëveshje nuk lidhet me një proces zgjedhor legjitim dhe, së dyti indirekt merr një kompetencë të Gjykatës Kushtetuese, pavarësisht se mund të mos shprehet për legjitimitetin e dekretit”.
Reagimi i plotë i Manjanit:
Sqarim:
Kolegji Zgjedhor nuk mund të shqyrtojë ankesa të subjekteve politike jashtë procesit zgjedhor.
Formalisht pas Dekretit të Presidentit ne nuk jemi në proces zgjedhor. Ndaj debati ka apo jo të drejtë një subjekt të largohet apo të rrijë në zgjedhje nuk ekziston përsa kohë që s’ka zgjedhje.
Në të shkuarën janë shqyrtuar kërkesa të tilla, por gjithnjë brenda një proçesi apo periudhe zgjedhore.
Rasti këtë radhë nuk është njësoj, sepse formalisht jemi jashtë proçesit.
Fakt është se nuk ka ende një datë zgjedhjesh. Fakt është gjithashtu se dekreti për anulimin e zgjedhjeve është në fuqi.
Fakt është se fuqinë e këtij dekreti e anulon ose vetë Presidenti ose Gjykata Kushtetuese.
Përsa kohë dekreti është në fuqi, Kolegji Zgjedhor nuk ka juridiksion të shqyrtojë mosmarrëveshje që lidhen me një proçes inekzistent.
Nga ana tjetër Kolegji nuk ka fuqi ligjore të bëjë ekzistent një proçes të tillë, qoftë dhe indirekt siç pretendon partia në pushtet.
Pra duke pranuar gjykimin e kërkesës së zotit Idajet Beqiri kundër KQZ, Kolegji gabon sepse së pari ajo mosmarrëveshje nuk lidhet me një proces zgjedhor legjitim dhe, së dyti indirekt merr një kompetencë të Gjykatës Kushtetuese, pavarësisht se mund të mos shprehet për legjitimitetin e dekretit.
Ndaj rruga e vetme e ligjshme është pushimi i gjykimit të çështjes.
Ose nëse duan ta gjykojnë, do duhet ta pezullojnë gjykimin dhe ti kërkojnë Gjykatës Kushtetuese interpretimin përfundimtar është apo jo Kushtetues Dekreti i Presidentit.
Vetëm kështu mund të shqyrtohet ajo çështje në mënyre korrekte sipas ligjit.
