Ish-ministri i Drejtësisë dhe njëherësh anëtari i kryesisë së Lëvizjes Socialiste për Integrim,Ylli Manjani thekson se Çadra që ngriti Basha e çau koalicionin dhe se kryeministri Rama dhe presidenti i sapozgjedhur, Ilir Meta, janë në armiqësi të thellë me njëri-tjetrin.
Duke diskutuar në rrjetin social Facebook, me akademikun Artan Fuga, mbi analizën që ky i fundit i bën krizës politike, Manjani vë në dukje se LSI dhe PS përveçse garojnë të ndara janë edhe në përplasje të vazhdueshme midis tyre.
Manjani sugjeron se Partia Demokratike duhet të hyjë në zgjedhje për t’u përballur me kryeministrin Rama, dhe sistemin e tij të korruptuar.
“Nuk ka asnjë dyshim që pika e ekuilibrit të dy anëve janë zgjedhjet. Zgjedhjet ku marrin pjesë të dy krahët, sigurisht! PD duhet të hyjë në zgjedhje me gjithë Ramën aty ku është, që ka kohë që s’është e me gjithë drogë, që thonë s’është, por në fakt është aty! Votuesit nuk janë budallenj! Ata e dinë tashmë se sa vlen secili. Mendoj se Çadra i dha PD-së disa beteja të fituara, përveç konsolidimit të Bashës si kryetar! Çadra konfirmoi policinë e drogës, e ndërkombëtarizoi atë! Çadra e çau koalicionin qeverisës sepse sot PS e LSI përveç se garojnë të ndara, janë në armiqësi të thellë, pavarësisht se ç’ thonë drejtuesit”, shkruan Manjani.
Manjani sugjeron se kreu i Partisë Demokratike, Lulzim Basha duhet ta vijojë kauzën e tij politike dhe për të arritur objektivat e duhura sipas Manjanit, ai duhet të regjistrohet në zgjedhje.
“Çadra ishte ngjarja politike më e rëndësishme e PD dhe e vendit gjithë këtë kohë. Ndaj nuk ka pse PD ta mbyllë çadrën duke e mbajtur hapur! Mendoj se duhet ta hapë duke e mbyllur! Kjo arrihet vetëm duke u regjistruar menjëherë në zgjedhje, pa pritur as amerikanë, as evropianë e as kinezë të ndërmjetësojnë. Duhet të hyjnë të paktën në votimet e kësaj radhe që të punojë për zgjedhjet e ardhshme, ashtu siç thoni dhe Ju, Profesor! Dhe jo t’i shtyjnë votimet, por mundësisht t’i afrojnë. Pastaj fillon puna, sistematikisht për reformën politike. Ka shumë gjëra për të bërë aty! Kështu e shoh zgjidhjen e kësaj çështje, por jo ende të krizës politike”, përfundon anëtari i kryesisë së LSI-së Ylli Manjani.
(TIRANA TODAY)
