Kryetari i Komisionit të Ligjeve, Ulsi Manja, i kërkon presidentit Meta që t’i bindet Kuvendit dhe Kushtetutës. Reagimi i tij pason pas akuzave të rënda që Kreu i Shtetit Meta ka bërë kundrejt kryetarit të KED, Ardian Dvorani. Në kundërpërgjigje, Manja ka deklaruar se Dvorani do të qëndrojë në detyrë deri në përfundim të mandatit. Sakaq, ai ka shtuar se presidenti është i lirë si çdo institucion tjetër t’i drejtohet Gjykatës Kushtetuese.
“Është shortuar për të qenë në krye të Këshillit të Emërimeve në Drejtësi dhe do të vazhdojë të kryejë funksionet në këtë post, deri në përfundim të mandatit. Jemi Republikë Parlamentare, dhe për këtë arsye Parlamenti ndërhyri për të zhbllokuar këtë situatë konfliktuale mes institucioneve.
Presidenti është i lirë si çdo institucion tjetër që ka pretendime të kësaj natyre t’i drejtohet Gjykatës Kushtetuese, dhe nuk ka nevojë për retorikë politike”, u shpreh Ulsi Manja.
Dje, Meta doli në një konferencë të jashtëzakonshme, për të bërë publike fakte të reja për kreun e Këshillit të Emërimeve në Drejtësi, Ardian Dvorani, ndaj të cilit ka depozituar një kallëzim penal, duke e akuzuar për aktivitet kriminal.
Meta tha se menjëherë do të depozitohet një shtesë në kallëzimin penal ndaj Dvoranit, dhe theksoi se atij duhet t’i ndalohet veprimtaria e organizuar kriminale. Po kështu, kreu i shtetit përsëriti qëndrimin e tij se qeveria po tenton që të bëjë grusht shteti. Ndërsa theksoi se po tentohet kontrolli mafioz, për të pasur në dorë Gjykatën Kushtetuese.
