Qëndrimi i Lulzim Bashës për raportin e ministrave teknikë për zgjedhjet e fundit parlamentare, ka sjellë edhe reagimin e kundërshtarit të tij kryesor në Partinë Demokratike Astrit Patozi.
Ky i fundit e cilëson Bashën si të fundosurin e kësaj beteje me zgjedhjet.
Sipas Patozit, Basha ishte bashkëpunëtor me Ramën para dhe gjatë zgjedhjeve dhe tani hedh akuza për blerje votash dhe manipulim të zgjedhjeve.
Përmes një postimi në profilin e tij në Facebook, Patozi shpjegon se Basha po pret të marrë një kockë nga pushteti i Ramës, por që vështirë t’ia hedhë ky i fundit, kur vetë Basha sipas Patozit nuk ka fuqi të marrë vendime.
“Sepse mes fushatës së qetë dhe pa asnjë denoncim të opozitës dhe “tmerreve” që përshkruan raporti, është në mes një det i tërë. Në të cilin i vetmi i fundosur këmbë e duar është Lulzim Basha. I cili ka përgjegjësi të plotë për memecërinë e Partisë Demokratike, që nga mesnata e 17 majit e deri në ditën e numërimit të votës së fundit në zgjedhjet e 25 qershorit. Sipas kësaj logjike i bie që çdo opozitë në atdheun tonë, që të provojë se qeveria i vjedh apo i manipulon zgjedhjet, duhet të ketë 6 apo më shumë ministra teknikë. Ndryshe, ajo vetë është e paaftë që të provojë edhe faktojë qoftë edhe një rast të vetëm abuzimi”, shprehet Patozi.
