Rreth 370 qytetarë kanë marrë shërbim nga dita e dielë e deri më sot, pas shfaqjes së shenjës së helmimit. Aktualisht në spital po marrin trajtimin e duhur rreth 30 qytetarë, fëmijë dhe të rritur.
Ministrja e Shëndetësisë, Ogerta Manastirliu, nga Kruja ku ka vizituar nga afër qytetarët e shtruar në spital tha se në mesin e pacientëve janë edhe fëmijë e adoleshentë. Ministrja Manastirliu garantoi se strukturat e Ministrisë së Shëndetësisë janë në gatishmëri, dhe po kryejnë hetimet në të gjitha pistat e mundshme.
Manastirliu njoftoi marrjen e mostrave dhe analizat laboratorike do të dalin për 24 deri në 72 orë. Shenjat kryesore të qytetarëve që kanë pasur probleme kanë qenë të vjella, diarre, dhimbje barku dhe temperaturë. Dyshimet janë se helmimi është shkaktuar nga uji i pijshëm.
“Rreth 370 qytetarë kanë marrë shërbim. Situata është e qetë, pa komplikacione. Qytetarët kanë marrë shërbimin e nevojshëm, janë konsultuar. Sot janë paraqitur rreth 60 qytetarë. Kanë marrë shërbim dhe janë nisur për në shtëpi, pasi situata shëndetësore s’ka qenë e rënduar, janë edhe disa pacientë të tjerë që janë duke marrë shërbim.
Janë rreth 30 qytetarë, janë edhe adoleshentë, fëmijë dhe të rritur. Pistat? Janë marrë mostrat e ujit dhe ushqimeve, hetimi po bëhet në të gjitha aspektet. Rezultati i analizave mikrobiologjike ka një afat të caktuar, kur të kemi rezultatet do kemi një raport të detajuar. I gjithë sistemi shëndetësor është në gatishmëri të plotë. Nëse do ketë raste të shtuara edhe në spitalin e Durrësit mund të vendoset në gatishmëri për rastet. Hetimi bëhet në shumë pista, që të kemi të kontrolluar të gjithë aspektin e kujdesit shëndetësor”.
