Këshilli i Ministrave ka miratuar sot një VKM, sipas së cilës nënave të papuna që kanë të ardhura nën 100 mijë lekë në familje dhe rrisin më shumë se 3 fëmijë deri në 5 vjeç, do t’u njihen si vite pune. Ministrja e Shëndetësisë, Ogerta Manastirliu ka dalë ditën e sotme në një njoftim për mediat, teksa është shprehur se nënat me shumë fëmijë dhe të papuna duhen mbështetur. Manastirliu bëri me dije se qeveria ka miratuar buxhetin e vitit 2023, i cili do të mbështesë nënat e papuna me tre e më shumë fëmijë me të ardhura familjare mujore deri në 100 mijë lekë. Sipas VKM-se nënat e papuna që kanë të ardhura nën 100 mijë lekë në familje dhe rrisin më shumë se 3 fëmijë deri në 5 vjeç, do t’u njihen si vite pune.
“Qëllimi i akteve që vijnë për ndryshim është mbështetja e grave që kanë më shumë se tre fëmijë, që janë të papuna, situata ekonomike është e tillë që kanë nevojë për mbështetjen e shtetit. Kemi vendosur që me buxhetin e viti 2023 të mbështesim këtë kategori nënash. Do kemi një kategorizim, të gjitha gra të cilat kanë tre dhe më shumë fëmijë. Të cilat njëri prej fëmijëve është deri në moshën 5 vjeç dhe të ardhurat familjare mujore nuk kalojnë 100 mijë lekë. Kjo është politikë për nënat, sociale, që synon të njohë si vite pune periudhën e kujdesit të fëmijës në 5 vitet e para”.
