Ministrja e Shëndetësisë Ogerta Manastirliu përgjatë një video-mesazhi u ka bërë thirrje qytetarëve që të tregohen të përgjegjshëm.
Në kohën kur në Shqipëri janë shënuar 18 viktima nga koronavirusi dhe janë regjistruar 333 raste pozitive, Manastirliu njoftoi se qeveria ka vendosur që të shtrëngojë masat.
Gjatë fjalës së saj, ajo theksoi se koronavirusi është i frikshëm, mirëpo e ka një dobësi.
“Ky virus e ka një dobësi, ai nuk kërcen dot nga njëri person tek tjetri nëse ne ruajmë distancën”, u shpreh Manastirliu.
Pjesë nga video-mesazhi i Ministres së Shëndetësisë: “Ky virus është i frikshëm! Jemi në një epidemi. Qeveria ka vendosur që të shtrëngojë masat.
Mirëpo ky virus e ka një dobësi, ai nuk kërcen dot nga njëri person tek tjetri nëse ne ruajmë distancën. Ju ftoj që të bëheni të ndërgjegjshëm sepse virusi sëmur këdo. Nuk jemi të pambrojtur, ne kemi një armë të fortë që quhet distancim social. Mjekët po sakrifikojnë 24 orë.
Unë jam e sigurt që nuk është vonë për secilin prej nesh që të zbatojmë higjienën, të respektojmë distancën. Kjo është një luftë që mund ta fitojmë vetëm duke u bërë bashkë… me durim, kurajo dhe forcë”.
