Në një lidhje me Skype, në RAI 3, kryeministri Rama ka pranuar se 30 mjekët dhe infermierët që kanë shkuar në Itali, e kanë marrë vendimin vetë, pa u konsultuar me familjarët. Madje ia zbuloi se këtë gjë e ka marrë vesh në aeroport. Rama tha se disa prej mjekëve kishte bërë këtë zgjedhje me ndërgjegje të plotë. E nëse do e merrnin këtë njoftim prindërit, atëherë ata nuk do ti linin për të shkuar pranë pacientëve në Itali.
Pjesë nga biseda:
Gazetarja: Keni folur me mjekët tuaj që janë këtu, sepse disa kanë ikur edhe pa lejen e prindërve, ngaqë kishin frikë se mos i ndalonin..?
Edi Rama: Ma kanë thënë në aeroport, që nëse do ta dinin prindërit e tyre, do t’u mbyllnin dyert dhe mund të mos i linin të iknin në atë luftë.
Gazetarja: Dua t’ju them të gjithëve atyre prindërve, se në Itali ka njerëz me zemër të madhe. Kështu që mos u bëni merak.
Tre ditë më parë, u nisën nga Rinasi drejt Italisë 10 mjekë dhe 20 infermierë shqiptarë, për t’i ardhur në ndihmë shtetit fqinj, pasi është nga vendet më të prekura nga COVID-19. Ky vendim i qeverisë shqiptare u mirëprit nga qeveria e shtetit fqinj, ndërsa kryeministri Conte nuk ngurroi që të falënderonte homologun, Edi Rama.
Vajtja e personelit shëndetësor shqiptar në Itali, është sipas një marrëveshje mes kryeministrit shqiptar Edi Rama dhe Ministrit të Jashtëm italian.
Mjekët do të qëndrojnë në Itali një muaj, dhe do të paguhen nga Shqipëria. Sipas vendimit, mjekët do paguhen 3 mijë euro në muaj dhe infermierët 2500, nga fondi rezervë i Buxhetit të Shtetit.
