Kreu i PD-së Lulzim Basha, ka paralajmëruar presidentin Meta për bëmat e tij, ndërsa përjashtimin e ish-kryeministrit Berisha e ka konsideruar një kapitull të mbyllur brenda PD-së. Në një intervistë për “Vizion Plus”, lideri i PD-së u shpreh se demokratët dhe Partia Demokratike nuk i ka asnjë borxh presidentit Ilir Meta, dhe nuk ia zgjidh dot hallet e tij. Basha tha se demokratët i njohin mirë bëmat dhe gjëmat e Metës, teksa iu kërkoi ndjesë që nuk i ka dëgjuar më mirë dhe më qartë.
Ditën që ju shpallët “trekëndëshin e Bermudës”, ju shpallët një front beteje me Ilir Metën. Pse e sulmuat ju Ilir Metën?
“As unë, as demokratët nuk i kemi asnjë borxh Ilir Metës, dhe nuk ia zgjidhim dot hallet Ilir Metës. Demokratët ia njohin bëmat dhe gjëmat. E vetmja gjë që kam për të shtuar, t’iu kërkoj ndjesë të thellë demokratëve, edhe në emër të strukturave drejtuese, që nuk e kemi dëgjuar më mirë dhe më qartë zërin e tyre”.
I pyetur nëse do të ketë më një koalicion të mundshëm me LSI-në, kreu demokrat u shpreh se kjo është një çështje që ka shteruar dhe nuk ka më nevojë për vëmendje.
E keni kërkuar dhe në 2017-ën, kur thatë nuk do të ketë koalicion me LSI-në. Këtë herë nuk do të ketë më koalicion me LSI-në, realisht?
“Nuk kam asgjë tjetër për t’i shtuar kësaj çështje, besoj se është shteruese dhe nuk kam ndërmend t’i jap askujt vëmendjen që nuk meriton, secilit i kam dhënë atë që meriton”.
Ndër të tjera, Basha deklaroi se në Kuvendin e 18 dhjetorit demokratët do ta bëjnë të qartë se partia nuk mund të mbahet peng nga Berisha dhe interesat e tij personale. Lidhur me mbajtjen e Kuvendit, Basha tha se askush nuk mund të bëjë çfarë ti thotë mendja, pasi partia ka një statut.
“Unë nuk flas për përjashtimin e Sali Berishës, une flas për zbatimin e statutit ndaj çdokujt, qoftë ky dhe Berisha. Këto dy muaj kohë, Berisha nuk i shfrytëzoi për të bërë të vetmin akt qe prisinin dhe meritonin demokratët, e që ai e premtoi në verë: që mos ta përfshinte PD-në dhe grupin parlamentar, që ka një detyrë shumë të rëndësishme përballë shqiptarëve – përballjen me regjimin e kryeministrit Edi Rama. Përkundrazi, iu mbivendos kësaj detyre parësore të PD.
Në vend që t’i përdorte këto dy muaj për atë që priste çdo demokrat, ashtu siç e premtoi, një distancim nga PD për ta vazhduar betejën e tij, të cilën ka vendosur ta ndjekë në mënyrë ligjore. Përkundrazi, e përdori këtë kohë për të shpalosur anët e tij më të errëta. Siç kemi parë gjatë javëve të fundit, me kulturën e lincimit dhe sulmeve më të turpshme, më të ulëta, përfshirë ndaj drejtueseve gra demokrate që nuk mendojnë si ai. Me një gjuhë të poshtër, denigruese, e cila, madje mund të them që në disa aspekte ia kalon edhe sulmeve që Rama bën ndaj të njëjtëve persona. Gjithçka ka ndryshuar që nga 9 shtatori. Rruga që Berisha ka zgjedhur, nuk ka asnjë lidhje me vlerat dhe parimet për të cilat qendron kjo parti. Ka zgjedhur të bëjë gjithçka për ta përdorur PD-në si mish për top për hallet e veta. Këtë nuk mund t’ia lejojë dhe t’ia falë asnjë demokrat i ndershëm”.
