Një person ka mbetur i vdekur dhe një tjetër ka mbetur i plagosur pas shkëmbimit të zjarrit mes tyre dhe policisë.
Ngjarja e rëndë ka ndodhur në Fier, rreth orës 03:00, ndërsa bëhet e ditur se përplasja erdhi pas ndërhyrjes se uniformave blu, në ndihmë të një familje që kishte dhënë alarmin për grabitje.
Hajdutët kanë tentuar të hyjnë brenda shtepisë së shtetasit M.M, duke thyer drynin e derës. Dhe kjo ka vënë alarm të zotin e shtëpisë që lajmëruar policinë, duke sjellë edhe “luftën” mes tyre dhe uniformave blu.
Policia ka bërë të ditur se ata ishin të maskuar dhe të armatosur me pistoleta, të cilat u sekuestruan në cilësinë e provës materiale.
“Autorët e tjerë, që dyshohet se janë edhe dy, duke qëlluar në drejtim të punonjësve të policisë janë larguar duke përfituar nga errësira dhe kushtet e motit, me një mjet ende të paidentifikuar”, – thuhet ndër të tjera në njoftimin e policisë.
Informacion paraprak
Në datën 23.03.2018, rreth orës 03:00, policia lokale u njoftua nga një telefonatë se në lagjen “29 Nëntori” Fier, pranë banesës së shtetasit M.M, disa persona kanë tentuar të hyjnë brenda shtepisë duke thyer drynin e derës.
Pas marrjes së njoftimit mbërritën në vendngjarje shërbimet e policisë, të cilët janë përballur me disa persona të maskuar e të armatosur me pistoleta e automatikë, të cilët kanë qëlluar me armë zjarri në drejtim të punonjësve të policisë.
