Ambasadorja amerikane në Shqipëri Yuri Kim, mori sot pjesë në aktivitetin përmbyllës të projektit të Komisionit për Demokraci me temë: “Ripërdorimi Social i Pasurive të Konfiskuara nga Krimi i Organizuar”.
Kim tha se Shtetet e Bashkuara mbështesin fuqimisht përpjekjet për të luftuar krimin e organizuar.
Duke folur mbi rishpërndarjen në shoqëri të pasurive të konfiskuara, Yuri Kim u shpreh se kjo gjë aktivizon rritjen ekonomike dhe ndihmon viktimat dhe komunitetet e prekura nga krimi i organizuar.
“Shtetet e Bashkuara mbështesin fuqimisht përpjekjet për të luftuar krimin e organizuar dhe përpjekjet forcojnë rolin e shoqërisë civile në parandalimin e korrupsionit, krimit të organizuar dhe abuzimeve të të drejtave të njeriut. Ripërdorimi shoqëror i pasurive të konfiskuara të krimit të organizuar është një shembull i përsosur se si këto përparësi janë të ndërlidhura dhe mbështesin njëra-tjetrën.
Ndërsa qeveria dhe institucionet e zbatimit të ligjit janë në ballë të luftimit të krimit të organizuar, shoqëria civile dhe qytetarët mund dhe duhet të luajnë një rol të rëndësishëm në të njëjtën luftë në mënyrën e tyre.
Ripërdorimi shoqëror i pasurive të konfiskuara të krimit të organizuar siguron një parandalim më efikas të krimit të organizuar, pasi aktivizon rritjen ekonomike dhe dinamikat e zhvillimit shoqëror përmes pjesëmarrjes shoqërore. Ai merr diçka që rrjedh nga një ndikim negativ në shoqëri dhe e kthen atë në një ndikim pozitiv.
Ajo demonstron mundësinë për të shndërruar fitimet e paligjshme në mundësi për të ndihmuar viktimat dhe komunitetet e prekura nga krimi i organizuar, dhe ndërton besimin midis qytetarëve dhe qeverisë”, ka thënë ndër të tjera Kim, në mbyllje të Projektit “Ripërdorimi Social i Aseteve të Sekuestruara të Krimit të Organizuar”., tha ambasadorja.
