Analisti Fatos Lubonja ka folur rreth debatit të krijuar për çështjen e Teatrit Kombëtar, i cili pritet të shembet për t’i hapur vendin ndërtimit të një teatri të ri.
I ftuar në rubrikën “Opinion” në News24, Lubonja u shpreh se si opozita ashtu edhe qytetarët, por edhe artistët kanë një kauzë për tu bërë të gjithë bashkë. Analisti vijoi më tej duke thënë se ditën që do të nisë shembja e Teatrit Kombëtar, opozita duhet ta bëjë simbol këtë ditë, të bëjë rezistencë bashkë me qytetarët.
“Aktorët janë gati të ruajnë godinën e Teatrit Kombëtar, por opozita nuk duhet ta shikojë çështjen e teatrit thjesht si teatër…se do vijë një ditë për shembjen e Teatrit dhe opozita duhet ta bëjmë simbol këtë ditë, simbol rezistence. Të dalin njerëzit, të bëjnë barrikadë, të bëhet aty një betejë për komunitetin, për fëmijët tanë. T’ju dilet përpara banditëve me të cilët Rama pastron paratë”, u shpreh Lubonja.
Sipas analistit, opozita duhet të zgjedhë një moto gjithëpërfshirëse që sa më shumë qytetarë të gjejnë veten e t’i ndjekin në rrugën që ata kanë ndjekur.
“Duhet një projekt i një Shqipërie tjetër që ta asimilojnë njerëzit, atëherë s’ka burrë nëne që e shemb Teatrin se shkon gjithë Tirana atje. Më vjen në mendje një slogan : “Shteti jemi ne”, pra e kam fjalën për ne qytetarët. Ky mund të ishte një slogan që njerëzit të bëhen pjesë”, tha ai.
