Analisti Fatos Lubonja tha se protesta e sotme ishte e militantëve të partive opozitare dhe jo e popullit. I ftuar në studion e lajmeve të News24, Lubonja sqaroi se një qeveri nuk mund të rrëzohet nga protesta të komanduara por nga revolta popullore . Ai tha se zhgënjimet e të kaluarës dhe një lloj nënshtrimi i popullit shqiptar, bëjnë që shqiptarët të vijmë në këto situata të sforcuar.
“Një protestë masive që bllokon jetën e vendit. Kjo nuk lidhet me gjithë qeverisjen. Vetëm një çështje mund ta rrëzonte, si çështja Tahiri. Pse nuk e kemi këtë vend të qytetëruar, përse nuk e kemi këtë popull? Çfarë i duhet këtij popullit që të ketë sensibilitet? Unë mendoj se veçanërisht zhgënjimet e të kaluarës dhe një lloj nënshtrimi i popullit shqiptar, bëjnë që ne të vijmë në këto situata të sforcuara.
Revolta bën edhe shkatërrim. Një popull i revoltuar shkatërron dhe rrëzon qeverinë. Këtu ka protesta të komanduara. Një popull vërtet i revoltuar, shkatërron.
Me këto parti që kemi ne, që kanë një background qeverisjeje zhgënjyes, nuk mund të sjellë protesta që mund të rrëzojnë qeverinë,” deklaroi Lubonja.
Analisti u shpreh se protesta e opozitës bëhet për të treguar se ajo është e fuqishme dhe e aftë të mbledhë njerëzit, por nuk përfaqëson një revoltë popullore, pavarësisht se drejtuesit e opozitës kanë denoncuar dhe evidentuar probleme shqetësuese.
“Protesta tregon një gjë evidente, se këto janë protesta militantësh, njerëz të revoltuar. Nuk ka një pakënaqësi popullore të gjerë dhe organizim që prej kohësh ka humbur në Shqipëri. Edhe fjalët e shumicës opozitare, edhe analizat dhe denoncimet që ata bëjnë, kanë shumë të vërteta. Pyetja që ngre unë është, këto të vërteta, kjo situatë, a ka një përgjigje popullore? Apo mbetemi te përgjigja e opozitës, që ka edhe problemet e veta. Një pjesë e mirë e qytetarëve që i kanë këto probleme, nuk dalin në bulevard. Kjo është një protestë, që mirë bën që e organizon opozita, se tregon që ka mbështetje,” u shpreh Lubonja.
