Analisti Lorenc Vangjeli ka deklaruar në emisionin “Të Paekspozuarit” se më 14 maj 2023 në Shqipëri do të mbahen zgjedhjet vendore, por ato nuk janë zgjedhje administrative, por thjesht politike. Sipas tij, përballë kandidatit Ilir Alimehmeti shanset për Këlliçin janë më të rritura. Analisti u shpreh se gara zhvillohet mes çifteve Rama-Veliaj dhe Berisha-Meta.
“Përballë kandidatit Ilir Alimehmeti shanset për Këlliçin janë më të rritura. Këlliçi është i avantazhuar për elektoratin, se është me ta, për ta, ndërsa Alimehmeti është autsajder.
Gara zhvillohet mes çifteve Rama-Veliaj dhe Berisha-Meta. I pari e do Tiranës se është matësi i pushtetit dhe një humbje e mundshme i kërcënon pushtetin edhe në nivel qendror, ndërkohë që Erioni kërkon të garojë edhe për projektin e tij të nesërm.
Ndërkohë që përballë është Sali Berisha dhe Ilir Meta. Cilido kandidat që të dalë, gara është e tyre. Këtu ndryshon edhe topologjia e kandidatit.
Zgjedhjet e 14 majit nuk janë zgjedhje administrative, por politike dhe në këtë garë politike kandidati i PD-së duhet t’i përgjigjet një pyetjeje: a është e mundur që të marrë edhe votat politike apo kandidati do ta kalonte edhe këtë gardh? Në këtë rast i avantazhuar është z. Alimehmeti.
Zgjedhjet më shumë se i fiton Erion Veliaj, se i humbasin këta të PD-së”, tha analisti.
Kandidati në primaret e Partisë Demokratike për Tiranën, Belind Këlliçi, tha se ndihet i nderuar që përballë tij të garojë mjeku Ilir Alimehmeti.
Këlliçi deklaroi në emisionin “Të paekspozuarit” se po i pret primaret me padurim, ndërsa pretendon se është i testuar para se të hynte në garë. Ai theksoi se ka dalë i treti më i votuari nga lista e deputetëve.
