Ministri i Kosovës, Valdrin Lluka ka reaguar në lidhje me skandalin në të cilën është përfshirë reperja kosovare, Loredana Zefi.
Në një prononcim për mediat teksa ishte i ftuar në inaugurimin e dhomës tregtare, zvicerano-kosovare, ai ka deklaruar se është në dijeni të kësaj ngjarje, ndërsa shtoi se veprimet e artistes kanë dëmtuar imazhin e Kosovës.
“Në Kosovë jemi shumë të shqetësuar për të mbrojtur imazhin tonë. Kjo ndodh veçanërisht për shtetet që janë miqësore me Kosovën. Zvicra historikisht gjithmonë na ka mirëpritur”, u shpreh ai.
Po ashtu, në momentin kur u pyet për situatën në të cilën është përfshirë Loredana Zefi, Lluka theksoi se nuk e njeh personalisht Loredanën, teksa mundohej që ta shmangte duke përmendur emra të tjerë, si shembuj pozitivë që kanë kontribuar në ndërtimin e imazhit të Kosovës, siç janë Xherdan Shaqiri, apo Granit Xhaka.
“Pikërisht për këto raporte duam t’i tregojmë Zvicrës se jemi njerëz të mirë. Më shumë se gjysma e përfaqësueses zvicerane vijnë nga Kosova”, tha ministri kosovar.
