Kryetari i Partisë Agrare Ambientaliste, Agron Duka ka deklaruar se ‘sakrificat’ e opozitës së bashkuar për të shkëputur lidhjen mes politikës dhe krimit nuk kanë qenë të lehta, ndërsa tregon se rezultatet e kësaj beteje po forcon kauzën e opozitës.
Po ashtu, Duka shprehet se përfshirja e krimit në politikë, ndërpritet vetëm duke larguar kryeministrin Edi Rama.
“Beteja e opozitës për të zhbërë simbiozën midis politikës dhe krimit nuk ka qenë e lehtë, megjithatë rezultatet e deritanishme të dekriminalizimit dëshmojnë drejtësinë e kauzës sonë.
Rënia e njëpasnjëshme e drejtuesve të komiteteve ekzekutive, të shpallura në 30 qershor, shënon fundin e lojës vigani-shkurtabiqi me anëtarët e mazhorancës.
Nuk janë shkurtabiqët, pra personazhet e rangjeve të ulëta të PS-së, që kanë përgjegjësi për situatën e krijuar në vend, por është vigani, ai që kryeson këtë forcë politike.
Ky vullnet politik, që ka sjellë përfshirjen e krimit në politikë-bërje, ndërpritet vetëm duke larguar kryeminsitrin aktual, duke ngritur një qeveri kalimtare që të çojë vendin në zgjedhje të lira dhe të ndershme, të cilat janë të domosdoshme për t’i dhënë legjitimitet Parlamentit dhe një hov të ri politikës shqiptare”, shkruan Duka.
